Sa Sardigna est una natzione chena peruna froma de soberanìa politica, economica, culturale. Ancora oe sa globalizatzione corfet su populu sardu, mascamente in tres bessos:
1. Sa deculturatzione, cun s’allontanamentu de sa limba sarda e de su connotu, oramai reduidos a fromas de folklore pro ispassiare e intratennere sos turistas. A issos los cumbinchent a bennere a bidere custa zente istrana, chi faeddat una limba (o faeddu, comente la giamant issos) antiga, a mandigare polcrabu e a si ch’imbolare a modde in su mare nostru, fatende balanzare unu muntone de inari a sos meres. Sos sardos, imbezes, mascamente cussos de sas “tzitades tzivilizadas” si nde faghent sa birgonza de su chi abarrat de s’identidade nostra, tratada che alga de muntonalzu.
2. Sa colonizatzione economica, ligada a sa culturale, at tancadu sa janna a donzi possibile isvilupu de un’economia sarda “de manu nostra” e at dadu a su capitalismu italiarzu e internatzionale piena libertade de si moere comente lis paret e lis piaghet. Nos ant arruinadu s’economia traditzionale de tipu agro-pastorale pro no’che tzaccare una de isfrutamentu chi corfet su logu e sas pessones. In sos annos ’70 sas industrias petrolchimicas isfrutaiant sos tribagliadores sardos e los lassaiant a su destinu issoro de casciaintegrados, cun sa pretzisa boluntade de ocidentalizare e bochire una cultura galu bia. Sos balanzos de sas furas in su logu sunt gitos a continente o in sas manos de sa classe compradora, gasi chi nudda podat essere imbestidu in dunu isvilupu sostenibile e ligadu a sas esizentzias de su populu sardu. Su chi nd’essit est un’economia theracca de s’italiana, chi est fatende a bisera totus sas siendas economicas nostras, comente sa produtzione de sas caciaras, s’artejanadu, sas cooperativas agricolas e a bi la sighire. Custa situatzione est gasi irraighinada chi, parte de sos sardos l’intendent comente naturale e chi no si podet vittire.
3. S’ocupatzione militare, su pius giaru de sos medios impreados, ponet in su logu unu muntone de carabineris, bases militares italianas, americanas, NATO e partiduras de esercitos de ateros istados comente Israele, chi s’adrestant a sa gherra e isperimentant armas noas chi, tantas boltas, bochint pessones etotu. Est s’assembru de s’arcipelagu de La Maddalena, cuntzedidu in su 1972 (chena peruna ratifica parlamentare) a sa marina militare americana chi b’at postu una base de sutamarinos nucleares. La Maddalena representat bene s’istadu de sas cosas chi sos sardos devent suportare, ca est s’emblema de sa fura’e ispatzios, resurtzas, dinari, chi nos corfet.
A pustis de 50 annos de lota, in su 2008 sa marina militare americana si nd’at a andare ma, a s’iscuta, s’istadu italianu (e sa theracca sua, sa regione autonoma) at aprontadu su seberu: su g8 e unu muntone de zimentu de lussu chi colat. Sa matessi istoria a Quirra, Teulada e Capo Frasca, ue s’esercitu italianu e internatzionale s’adrestat cun munitziones a s’uraniu impoberidu cajonende unu numeru disbarattadu de criaduras e bestiamine chi naschent isformados. Custu sempre chena irmentigare sos dannos a sa terra e s’impossibilidade de isvilupare peruna economia, comente nos demonstrat s’istoria de sos piscadores de Teulada, chi lis ant cazadu su diritu a su tribagliu.
Custa est sa terra chi s’istadu italianu at seberadu che domo de su g8 in su 2009. Bisonzat de connoschere custa situatzione, fraighende una mobilitatzione internatzionale; est importante de torrare a nos ammentare chi su g8 no lu sunt fatende in Italia, lu sunt fatende in Sadigna, e nos cherent dare un atera iscutulada a bucca; no podimus abarrare mudos ancora. Zertu, sos moimentos ant a cuntestare su g8 e su cuntennidu de globalizatzione e imperialismu chi gighet, ma, semus cumbintos chi, custas, podant abarrare paraulas boidas si no lis damus una cara e una realidade concreta.
Representantes Frantzesos, Ghermanos, Americanos, Canadesos, Giaponesos, Russos, Inglesos ant a bennere ufficialmente a cuntrestare de gherra contra a sa pobertade, a s’AIDS e a sa protetzione de s’ambiente. Imbetzes no si detzidit nudda, petzi si cunfrimmant politicas de gherras fatas aterue.
Semus de acordu cun custas criticas, ma est un ateru su contributu specificu chi cherimus batire. Medas de custos istados repriment cun violentzia sas lotas de liberatzione natzionale chi s’isvilupant in su logu issoro: Su Canada cun su Quebec, Sos americanos cun sos nieddos e sos indianos, s’Inghilterra cun sos Irlandesos, Scotzesos e Gallesos, sa Frantza cun sos Corsicanos, Occitanos, Bretones e Bascos, sa Russia cun sos Cecenos, s’Italia cun sos Sardos. Cherimus chi sas mobilitatziones contra a su g8 de su 2009 appant unu significu in pius de sas semplitzes lotas contra a sas politicas neoliberistas de sa globalizatzione. Sa nostra est un’appellascione a totus sos moimentos internatzionales antimperialistas e anticapitalistas, e a totus sos moimentos chi gherrant in Europa e in su mundu pro li reconnoschere su diritu a s’autoditzisione e a sa soberanìa politica, economica, culturale.
Pro una fila’e rejones ligadas a s’occupadura italiana puru, sos sardos sunt unu de cussos populos corfidos dae su fenomenu de su disterru. Sunt resessidos a mantennere sas ligaduras cun sa terra issoro e no ant perdidu sas siendas culturales chi battiant. Lu proat sa naschida, in totu su mundu, de chentinaja de sotzius sardos, dae s’America a s’Australia a s’Italia. Est custa Sadigna disterrada, de unu milione e mesu de pessones chi nos at fatu cumprendere sas potentzialidades mannas chi sos sardos disterrados podent aere in sa lota de liberatzione natzionale e sotziale e pessamus chi custu g8 podat resessire che chentru de agregatzione pro totus cussos sardos chi cherent parare custa atziada.
Gasi s’idea de faghere naschere in paritzas zitades italianas -e perue sos disterrados sardos sient- sos “sotzius de sos disterrados sardos contra a su g8”. Cussos ant su compitu de battire cuscientzia e collaboratzione in sa mobilitatzione contra a su g8 e de faghere connoschere sas rejones de sas lotas nostras a s’estèriu, gasi chi s’intumbu de sa chistione sarda podat bessire a campu .
Ischimus bene chi, in Sardigna, su g8 s’isvoligat donzi die e su tribagliu chi cherimus faghere no est s’approntadura de un’eventu mediaticu mannu ma unu biculu in sa lota nostra de liberatzione natzionale e, pius in generale, in sa lota pro s’autoditzisione de totus sas natziones chena istadu.